महापुरुषांच्या जयंती उत्सवास संभाजी महाराज व गोपीचंद पडळकर शिवाजीनगरला उपस्थित राहणार

कडेपूर :वार्ताहर
शिवाजीनगर ता. कडेगांव येथे मंगळवार, दि. २१ मे रोजी खासदार छत्रपती संभाजी महाराज व बहुजन नेते गोपीचंद पडळकर उपस्थित राहून मार्गदर्शन करणार असल्याची माहिती शिवशक्ती सोशल फौंडेशनचे अध्यक्ष प्रमोद मांडवे यांनी दिली. यावेळी ते म्हणाले, सामाजिक न्याय व सशक्तीकरण मंत्रालय स्थापित डॉ. आंबेडकर फौंडेशन व शिवशक्ती सोशल फौंडेशन यांच्या संयुक्त विद्यमाने सर्व महापुरुषांचा संयुक्त जयंती उत्सव साजरा केला जात आहे. यानिमित्ताने व्याख्यानमाला व सांस्कृतिक कार्यक्रम आयोजन केले आहे.
कार्यक्रमामध्ये कडेगांवचे पोलीस निरीक्षक विपिन हसबनीस, अॅड. प्रमोद पाटील, अॅड. आर. एम. वजीर, वज्रधारी न्युजचे संपादक दत्तकुमार खंडागळे आदी मान्यवर मार्गदर्शन करणार आहेत. तसेच परकीया चित्रपट फेम शुभम सातपुते व टीमचा देशभक्तीपर व महापुरुषांच्या जीवनगाथा गायनाचा सांस्कृतिक कार्यक्रम होणार आहे. सदर कार्यक्रमासाठी छत्रपती संभाजी महाराज व गोपीचंद पडळकर उपस्थित राहणार असल्याने नागरिकांमध्ये उत्सुकता आहे.

काँग्रेसचे ज्येष्ठ नेते नानासाहेब महाडिक यांचे निधन

IMG-20190511-WA0000इस्लामपूर : काँग्रेसचे जेष्ठ नेते, उद्योगपती, वनश्री नानासाहेब रामचंद्र महाडिक (वय 71) यांचे आज दुपारी त्यांच्या निवासस्थानी हृदयविकाराच्या तीव्र धक्‍क्‍याने निधन झाले. कृषी राज्यमंत्री सदाभाऊ खोत व नानासाहेबांचे जेष्ठ बंधू महादेवराव महाडिक यांनी नानासाहेब महाडिक यांच्या मृत्युबाबत सायंकाळी पाचच्या सुमारास अधिकृत घोषणा केली. महाडिक यांच्या पश्‍चात पत्नी मिनाक्षीताई, मुले पंचायत समिती सदस्य राहुल महाडिक, माजी जिल्हा परिषद सदस्य सम्राट महाडिक, मुलगी सांगली महापालिकेच्या नगरसेविका रोहिणी पाटील, जावई, सुना, नातवंडे असा परिवार आहे. माजी आमदार महादेवराव महाडिक यांचे कनिष्ट बंधू तसेच खासदार धनंजय महाडिक व आमदार अमल महाडिक यांचे ते सख्खे चुलते होत.
आज दुपारी पेठनाका (ता. वाळवा) येथील निवासस्थानी त्यांना हृदयाविकाराचा तीव्र धक्का बसला. त्यांना तातडीने इस्लामपूर येथील सुश्रुषा हॉस्पीटल मध्ये उपचारासाठी हलवण्यात आले करण्यात आले. मात्र उपचार सुरु करण्यापुर्वीच त्यांची प्राणज्योत मालवली होती. महाडिक यांच्या निधनाची माहिती समजताच तालुक्‍यातील सर्वपक्षीय राजकीय नेते व कार्यकर्त्यांनी रुग्णालयाकडे धाव घेतली. त्यामुळे रुग्णालय परिसरात असलेल्या पेठ-सांगली रस्त्यावर वाहतुकीची कोंडी झाली. नानासाहेब महाडिक यांचे ज्यष्ठ चिरंजीव राहुल महाडिक कुटुंबासह कालच (शुक्रवारी) जर्मनीला गेले आहेत. आज सायंकाळी सहाच्या सुमारास ते जर्मनी येथे पोहचले. दरम्यान नानासाहेब महाडिक यांचा मृत्यु झाला. उद्या राहुल महाडिक सायंकाळी चार पर्यंत येलूर येथे पोहचतील. त्यानंतर सहा वाजता त्यांचे मुळ गाव येलूर येथे नानासाहेब महाडिक यांच्यावर अंत्यसंस्कार होणार आहेत.

तत्पुर्वी दुपारी तीन वाजल्यापासून त्यांचा मृतदेह पेठ येथील सम्राट या निवासस्थानी अंत्यदर्शनासाठी ठेवण्यात येणार आहे. महाडिक यांच्या निधनाचे वृत्त समजताच कृषी राज्यमंत्री सदाभाऊ खोत, माजी आमदार महादेवराव महाडिक, सी. बी. पाटील, दि. बा. पाटील, शिवसेनेचे जिल्हा प्रमुख आनंदराव पवार, नगराध्यक्ष निशिकांत पाटील यांच्यासह अन्य मान्यवरांनी रुग्णालयाकडे धाव घेतली.

तुम्ही सर्व मर्यादा ओलांडल्या; सुषमा स्वराज यांचा ममतांवर निशाणा

images (12)

लोकसभा निवडणुकीच्या पार्श्वभूमीवर सर्वच पक्षांमध्ये आरोप प्रत्यारोपांच्या फेऱ्या सुरू आहेत. त्यातच काही दिवसांपूर्वी पश्चिम बंगालच्या मुख्यमंत्री ममता बॅनर्जी यांनी पंतप्रधान नरेंद्र मोदी यांच्यावर बोचरी टीका केली होती. त्यानंतर आता  पंतप्रधानांवर आक्षेपार्ह वक्तव्य करून ममता बॅनर्जी यांनी सर्व मर्यादा ओलांडल्याचे सांगत परराष्ट्र मंत्री सुषमा स्वराज यांनी त्यांना धारेवर धरले.

तुम्ही एका राज्याच्या मुख्यमंत्री आहात आणि नरेंद्र मोदी हे देशाचे पंतप्रधान आहेत. ममताजी तुम्ही सर्व मर्यादा ओलांडल्या आहेत. यापुढेही तुम्हाला त्यांच्याशीच चर्चा करायची आहे, असे ट्विट करत स्वराज यांनी ममतांवर निशाणा साधला.
पश्चिम बंगालच्या मुख्यमंत्री ममता बॅनर्जी या खालच्या दर्जाचे राजकारण करीत असून आपण फॅनी वादळाने राज्यात निर्माण झालेल्या परिस्थितीबाबत विचारपूस करण्यासाठी दूरध्वनी केला तेव्हा त्यांनी बोलण्याचे टाळले, त्यांनी वादळावरही राजकारण केले अशी टीका पंतप्रधान नरेंद्र मोदी यांनी एका सभेदरम्यान केली होती. दीदींना राजकारणात जास्त रस आहे. मी राज्याच्या अधिकाऱ्यांशी बोलण्याचा प्रयत्न केला पण तो संपर्कही राज्य सरकारने होऊ दिला नसल्याचा आरोप त्यांनी केला होता.

त्यानंतर त्याला उत्तर देत मोदी यांनी वादळग्रस्त ओदिशाचा दौरा केल्यानंतर आपल्याला कलाइकुंडा येथे भेटीसाठी बोलावले होते. मात्र ते बोलावतील तेथे जाण्यासाठी आम्ही त्यांचे नोकर आहोत का? निवडणुकीच्या काळात मी मुदत संपलेल्या पंतप्रधानांसोबत व्यासपीठावर का जावे, असा प्रश्न ममतांनी विचारला होता. तसेच मोदी आणि अमित शाह हे दुर्योधन आणि दुःशासनासारखे आहेत, अशी टीकाही ममता बॅनर्जी यांनी केली होती. ममता बॅनर्जींच्या याच टीकेवर स्वराज यांनी ट्विटरवरून निशाणा साधला.