आम्ही गोळा-बारुद घेऊन तयार – आ.नितेश राणे

मला अभिमान आहे मी भारतीय जनता पक्षाचा आमदार आहे. ज्या पक्षाने सत्तेसाठी लाचारी केली नाही.. एक जबाबदार विरोधी पक्ष म्हणून आम्ही काम करणार. बंगल्यात बसून आदेश देण सोपं असतं, आता सभागृहात उत्तर द्यायची आहेत.आम्ही गोळाबारूद घेऊन तयार आहोत”, असे आवाहन आमदार नितेश राणे यांनी केले.  

  जवळपास एक महिना चाललेल्या नाट्यमय घडामोळीनंतर महाराष्ट्र्रात सत्तास्थापनेचा मार्ग मोकळा झालेला आहे. शिवसेना, राष्ट्रवादी काँग्रेस-काँग्रेस व मित्रपक्षांनी मिळून महाविकास आघाडीची स्थापणा केली. उद्या सायंकाळी साडे सहा वाजता उद्धव ठाकरे यांचा शिवतीर्थावर शपथविधी सोहळा संपन्न होणार आहे. काँग्रेसमधून भाजपात आलेले नितेश राणे यांनी आज आमदारकीची शपथ घेतली.

देवेंद्र फडणवीस यांच्या नावावर तीन विक्रम

Devendra phadanvis resign

1) सलग पाच वर्षे मुख्यमंत्री पदाचा कार्यकाळ

माजी मुख्यमंत्री वसंतराव नाईक यांच्यानंतर सलग पाच वर्षे मुख्यमंत्री पदाचा कार्यकाळ पूर्ण करणारे देवेंद्र फडणवीस हे पहिले मुख्यमंत्री ठरले आहेत.

2) अल्पकाळ टिकलेल्या सरकारचे मुख्यमंत्री

सगळ्यात अल्पकाळ टिकलेल्या सरकारचे मुख्यमंत्री राहण्याचा देखील विक्रम त्यांच्या नावे नोंदवला गेला आहे. १९६३ मध्ये मारोतराव कन्नमवार यांच्या निधनानंतर पी.के.सावंत यांच्याकडे आठ दिवसांसाठी मुख्यमंत्रीपद आले होते. यानंतर वसंतराव नाईक मुख्यमंत्री झाले होते. मात्र देवेंद्र फडणवीस यांनी हा आठ दिवसांचा विक्रम देखील मोडीत काढला. अवघ्या तीन दिवसांत त्यांना मुख्यमंत्रीपदाचा राजीनामा द्यावा लागलेला आहे.

3) एकाच महिन्यात दोनदा राजिनामा

याशिवाय एकाच व्यक्तीने महिनाभराच्या आत दोनदा मुख्यमंत्रीपदाचा राजीनामा देण्याचाही विक्रम आज फडणवीस यांच्या नावावर नोंदवला गेला आहे.

‘नॉट रिचेबल’ असलेले धनंजय मुंडे राष्ट्रवादी कॉंग्रेसच्या बैठकीत दाखल

Nationalist Congress Party leader Dhananjay Munde
धनंजय मुंडे

राज्यातील सत्तास्थापनेबाबत सातत्याने घडामोडी घडत असल्याचे दिसून येत आहे. याच पार्श्वभूमीवर शुक्रवारपासून ‘नॉट रिचेबल’ असलेले परळी मतदारसंघातील धनंजय मुंडे राष्ट्रवादी कॉंग्रेसच्या बैठकीत दाखल झाले आहेत. सध्या राष्ट्रवादी कॉंग्रेसचे नेते धनंजय मुंडे यांनी यशवंतराव चव्हाण सेंटरमध्ये दाखल झाल्यानंतर पुन्हा एकदा राजकारणाला एक वेगळे वळण आले आहे. आतापर्यंत बोले जात होते की, धनंजय मुंडे हे देखील अजित पवार यांच्यासोबत आहेत. मात्र, आता बैठकीला आल्यानंतर धनंजय मुंडे यांनी माध्यमांशी बोलताना ‘मी इथेच आहे’, अशी प्रतिक्रिया दिली आहे.

धनंजय मुंडे राष्ट्रवादी कॉंग्रेसच्या बैठकीत

राष्ट्रवादी कॉंग्रेसच्या आमदारांची महत्वपूर्ण बैठक यशवंतराव चव्हाण सेंटरला पार पडत आहे. शरद पवारांच्या नेतृत्वाखाली पार पडणाऱ्या या बैठकीत नवीन विधिमंडळ नेत्याची निवड करण्यात येणार असल्याची माहिती देण्यात आली आहे. शुक्रवारपासून कोणत्याही नेत्यांच्या संपर्कात नसलेले धनंजय मुंडे बैठकीला आल्यानंतर कार्यकर्त्यांनी घोषणाबाजी करण्यास सुरुवात केली.

नेमके काय घडले?

अजित पवारांसोबत १०-११ आमदार शपथविधी सोहळ्यात उपस्थित होते. त्यामुळे अजित पवारांसोबत राष्ट्रवादीचे आमदार फुटल्याची चर्चा सांगण्यात आली. मात्र, शरद पवारांनी अजित पवारांसोबत गेलेल्या आमदारांशी संवाद झाला. त्यानंतर आतापर्यंत ७ आमदार पक्षात पुन्हा परतले आहेत. यामध्ये दिलीप बनकर, नानसाहेब झिरवळ, माणिकराव कोकाटे, संदीप क्षीरसागर, सुनील भुसारा, डॉ. राजेंद्र शिंगणे आणि सुनील शेळके, असे आमदार राष्ट्रवादीसोबत कायम राहिले आहेत.

बाळासाहेब ठाकरेंना अभिवादन करण्यासाठी राज्यभरातून शिवसैनिक शिवतीर्थावर

शिवसेना प्रमुख बाळासाहेब ठाकरे यांचा आज (17 नोव्हेंबर) 7 वा स्मृतीदिन आहे. या पार्श्वभूमीवर राज्यभरातून शिवसैनिक शिवतिर्थावर दाखल झाले आहेत. बाळासाहेब ठाकरे यांचे स्मृतीस्थळी आकर्षक अशी फुलांची सजावट करण्यात आली आहे. आज दिवसभरात अनेक दिग्गज नेते या ठिकाणी येऊन बाळासाहेब ठाकरे यांना अभिवादन करतील.

दरवर्षी बाळासाहेब ठाकरे यांच्या स्मृतीदिनानिमित्त हजारो शिवसैनिक शिवाजी पार्क येथील शिवतिर्थावर गर्दी करतात. यावर्षीच्या स्मृतीदिनाला काहीशी वेगळी राजकीय पार्श्वभूमी आहे. यावेळी ठाकरे कुटुंबातील पहिला ठाकरे निवडणूक मैदानात उतरुन विधानसभेत पोहचला आहे. दुसरीकडे शिवसेनेने भाजपसोबतच्या मागील 30 वर्षांपासूनच्या युतीचा मार्ग सोडत काँग्रेस-राष्ट्रवादी काँग्रेससोबत सरकार स्थापन करण्याचा प्रयत्न सुरु केला आहे.

दरवर्षी बाळासाहेब ठाकरे यांच्या स्मृतीदिनानिमित्त हजारो शिवसैनिक शिवाजी पार्क येथील शिवतिर्थावर दर्शनासाठी येतात. यावर्षीच्या स्मृतीदिनाला काहीशी वेगळी राजकीय पार्श्वभूमी आहे. कारण, पहिल्यांद्याच ठाकरे कुटुंबातील सदस्याने निवडणूक लढवली आहे. तर, दुसरीकडे शिवसेनेने भाजपसोबत फारकत घेऊन आघाडीशी घरोबा केला आहे. दरम्यान, बाळासाहेब ठाकरे यांच्या स्मृतीदिनीच शिवसेनेचा मुख्यमंत्री शपथ घेणार अशी चर्चा सुरु होती. मात्र, तसं काही झालेलं दिसत नाही. सत्तास्थापनेसाठी शिवसेना आणि काँग्रेस-राष्ट्रवादी काँग्रेसमध्ये बैठकांचे सत्र सुरुच आहे. त्यामुळे सत्तास्थापनेवर अंतिम निर्णय कधी होणार हे पाहावे लागणार आहे. शिवसेनेशी सूर जुळविलेल्या काँग्रेस आणि राष्ट्रवादीतील प्रमुख नेते यानिमित्त शिवतीर्थावर जातील अशी दाट शक्यता आहे. या तिन्ही पक्षांच्या  नेत्यांची नुकतीच संयुक्त बैठक झाली होती.  

राज्यात भाजपशिवाय कोणीही सरकार स्थापन करु शकत नाही-देवेंद्र फडणवीस

Devendra Fadnavis on Government Formation

नवमहाराष्ट्र वेब टीम : राज्यात राष्ट्रपती राजवट लागू झाली असतील तरी सत्ता स्थापनेसाठी अनेक पक्षांची जुळवाजुळव सुरु आहे. शिवसेनेने मुख्यमंत्रीपदाच्या मागणीवरुन भाजपशी फारकत घेत काँग्रेस-राष्ट्रवादी काँग्रेससोबत नवी सत्ता समीकरणं तयार करण्यास सुरुवात केली आहे. असं असलं तरी माजी मुख्यमंत्री आणि भाजपचे विधीमंडळ पक्षनेते देवेंद्र फडणवीस यांनी राज्यात भाजपशिवाय इतर कुणाची सत्ताच येऊ शकत नाही (Devendra Fadnavis on Government Formation), असा दावा केल्याची माहिती सुत्रांनी दिली आहे.

देवेंद्र फडणवीस यांनी आमदारांच्या बैठकीत आमदारांना भाजपचीच सत्ता येणार असल्याचा विश्वास दिला. सूत्रांनी दिलेल्या माहितीनुसार फडणवीस म्हणाले, “राज्यात भाजपशिवाय सत्ता येऊच शकत नाही. मुंबईत येऊ नका, शेतकऱ्यांच्या बांधावर जा. लोकांमध्ये जाऊन भाजपचेच सरकार येणार असल्याचं ठासून सांगा. जेव्हा सरकार येणार असेल तेव्हा मुंबईत बोलावू.”

सत्ता स्थापनेच्या वेळेस मुंबईत बोलावू. तोपर्यंत जनतेत जाऊन भाजप सरकार येणार हा विश्वास देण्याच्या सूचनाही यावेळी देण्यात आल्या. विशेष म्हणजे यावेळी फडणवीसांनी शिवसेनेचा उल्लेख करणेही टाळले.

‘तीन अंकी नाटकावर आम्ही लक्ष ठेवून’

आशिष शेलार यांनी बैठकीची अधिकृत माहिती देताना आमचे मुख्यमंत्रिपदाचे उमेदवार देवेंद्र फडणवीस हेच असल्याचं सांगितलं. ते म्हणाले, “राज्यातील राजकीय परिस्थिती आणि इतर पक्षातील चर्चांसोबतच सत्ता स्थापनेच्या तीन अंकी नाटकावर आम्ही लक्ष ठेवून आहे.”

राज्यभरात 90 हजार बुथवर पक्षाच्या संघटनात्मक निवडणुका होणार आहेत. उद्यापासून (15 नोव्हेंबर) ग्रामीण भागातील आमदार आणि परवापासून (16 नोव्हेंबर) शहरी भागातील आमदार, परिषदेच्या आमदारांसह अतिवृष्टीमुळे नुकसान झालेल्या भागात दोन ते तीन दिवसांचा मदत पाहणी दौरा करणार आहे, अशीही माहिती आशिष शेलार यांनी दिली.

रिलायन्स इंडस्ट्रीज सुरू करणार डिजिटल कंपनी, अमेझॉन- फ्लिपकार्टला टक्कर देणार नवी योजना

देशातील सर्वात श्रीमंत व्यक्ती आणि रिलायन्स इंडस्ट्रीजचे अध्यक्ष मुकेश अंबानी आता दिग्गज ई-कॉर्मर्स कंपन्यांना टक्कर देण्याच्या तयारीत आहेत. वृत्तानुसार, ते २४०० कोटी डॉलरची डिजिटल कंपनी सुरु करणार आहेत. देशाच्या इंटरनेट शॉपिंग क्षेत्रातील त्यांच्या साम्राज्याचा मार्ग ही कंपनी प्रशस्त करणार आहे. रिलायन्स इंडस्ट्रीज लिमिटेडच्या (आरआयएल) मंडळांने पूर्ण मालकीच्या या सहायक कंपनीत १५०० कोटी डॉलर (सुमारे १.०८ लाख कोटी रुपये) गुंतवणूक करण्यास मंजुरी दिली आहे. ही सहायक कंपनी रिलायन्स समुहातील रिलायन्स जिओ इन्फोकॉम या दुरसंचार कंपनी गुंतवणूक करणार आहे. योजनेनुसार या सहायक कंपनीतून जिओत भांडवलाचे हस्तांतरण अनेक टप्प्यांत होईल. अशारितीने मार्च २०२० पर्यंत जिओ पूर्णपणे कर्जमुक्त होईल. रिलायन्स इंडस्ट्रीजकडून जारी करण्यात आलेल्या पत्रकात ही माहिती दिली आहे. जिओवर सध्या सुमारे ८४ हजार कोटी रुपयांचे कर्ज आहे.


पत्रकानुसार, अलीबाबा ग्रुप होल्डिंग्ज लिमिटेड आणि अल्फाबेच इंक प्रमाणे रिलायन्स इंडस्ट्रीज पर्यायी रुपांतरित प्राधान्य समभागाच्या माध्यमातून या होल्डिंग गुंतवणूक करेल. पालक कंपनीकडून जिओमध्ये करण्यात आलेल्या ६५ हजार कोटी रुपयांच्या समभाग गुंतवणुकीचे अधिग्रहण ही होल्डिंग कंपनीकरेल. यामुळे स्पेक्ट्रमचे देणे वगळता जिओ कर्जमुक्त होईल. नवी सहायक कंपनी झाल्यामुळे रिलायन्सचा सर्व डिजिटल व्यवसाय आणि अॅप एका कंपनी अंतर्गत येईल. यात माय जिओ, जिओ टीव्ही, जिओ सिनेमा, िजओ न्यूज आणि जिओ सावन यासारख्या अॅपच्या समावेश आहे. याशिवाय हेल्थकेअर, शिक्षण यासारख्या क्षेत्रांत ही कंपनी तंत्राज्ञानाच्या आधारे काम सुरू ठेवेल. याच बरोबर पुढील पिढीचे तंत्र अर्थात आर्टिफिशियल इंटेलिजन्स, ब्लॉकचेन, व्हर्च्युअल आणि आगमेंटेड रियलिटी आदीवरही काम करेल.

डेटा – डिजिटल सेवा रिलायन्सचे वृद्धी क्षेत्र

रिलायन्स इंडस्ट्रीजचे बाजार भांडवल ९.०९ लाख कोटी रुपये आहे. सध्या ही कंपनी तेलपासून ते पेट्रोकेमिकलच्या व्यवसायात कार्यरत आहे. मात्र,डेटा आणि डिजिटल सेवा आगामी काळात रिलायन्स समुहाच्या विस्ताराचे क्षेत्र राहील असे संकेत नव्याने उचलेल्या पावलावरून दिसताहेत. ही कंपनी, अमेझॉन डॉट इन आणि वॉलमार्टच्या मालकीच्या फ्लिपकार्ट डॉट कॉम प्रमाणे ऑनलाइन प्लॅटफॉर्म उभारणार आहे. रिटेलसह नवे व्यवसाय रिलायन्स समुहाच्या उत्पन्नात ३२ टक्के वाटा उचलत असल्याचे मुकेश अंबानी यांनी ऑगस्टमध्येत समभागधारकांना सांगितले होते.

अखेर महाराष्ट्रात राष्ट्रपती राजवट लागू, आदेशावर राष्ट्रपतींची स्वाक्षरी

विधानसभा निवडणुकीच्या निकालानंतर झालेल्या राजकीय अभूतपूर्व गोंधळानंतर आज (१२ नोव्हेंबर) अखेर महाराष्ट्रात राष्ट्रपती राजवट लागू झाली आहे. महाराष्ट्रातील एकाही पक्षाला बहुमत सिद्ध करु न शकल्याने आज राज्यपाल भगतसिंह कोश्यारी यांनी केंद्रीय गृहमंत्रालयाला राष्ट्रपती राजवटीची शिफारस केली होती. त्यांच्या या शिफारशीला अखेर राष्ट्रपती रामनाथ कोविंद यांनी मंजुरी दिली आहे. या आदेशावर संध्याकाळी साडेपाच वाजेच्या दरम्यान राष्ट्रपतींनी सही केली असून आता महाराष्ट्रात राष्ट्रपती राजवट लागू झाली आहे. 

राज्यपालांनी केलेल्या शिफारसीनंतर पंतप्रधान नरेंद्र मोदी यांनी केंद्रीय मंत्रिमंडळाची तातडीची बैठक बोलावली होती. याच बैठकीत राज्यपालांनी केलेल्या शिफारसीला केंद्रीय मंत्रिमंडळाची परवानगी देखील मिळाली. त्यानंतर याबाबतच्या आदेशावर राष्ट्रपतींनी आपली स्वाक्षरी केली आहे.

राज्यपालांनी सत्ता स्थापनेसाठी सुरुवातीला सर्वात मोठा पक्ष म्हणून भाजप, त्यानंतर दुसरा मोठा पक्ष म्हणून शिवसेना आणि तिसरा मोठा पक्ष राष्ट्रवादी काँग्रेसला आमंत्रण दिलेलं होतं. पण हे तीनही पक्ष बहुमत सिद्ध करु न शकल्याने राज्यपालांनी राष्ट्रपती राजवटीची शिफारस केली होती. जी शिफारस आता मान्य झाली आहे. त्यामुळे आता राज्याचा संपूर्ण कारभार राज्यपालांच्या हाती आला आहे. त्यांच्याच देखरेखीखाली आता महाराष्ट्रातील राज्यशकट हाकलं जाणार आहे.

बहुमताचा आकडा एकाही पक्षापाशी नसल्याने कुणा तरी पक्षाच्या मदतीने राज्यात सत्ता बनविणं क्रमप्राप्त आहे. अशावेळी आता राष्ट्रवादी काँग्रेस, शिवसेना आणि काँग्रेस या तीनही पक्षांना एकत्र येऊन समान किमान कार्यक्रम ठरवून आणि सत्तेतील पदांच्या वाटपाबाबत चर्चा करुन सत्तास्थापनेसाठी प्रयत्न करावी लागेल. राज्यात राष्ट्रपती राजवट जरी लागू झाली असली तरीही हे तीनही पक्ष एकत्र येऊन सत्ता स्थापन करु शकतात. त्यामुळे आता हे तीन पक्ष एकत्र येणार की, भाजप काही नवी खेळी करुन पुन्हा एकदा आपलं सरकार स्थापन करणार का? हे पाहणं महत्त्वाचं ठरणार आहे. 

त्यासाठी २४ तासांचा वेळ पुरेसा नाही. त्यामुळे राज्यपालांकडे वेळ वाढवून मागितली होती. पण राज्यपालांनी ही मागणी नाकारल्यामुळे आता महाराष्ट्राची वाटचाल राष्ट्रपती राजवटीच्या दिशेने सुरु झाली आहे.

रुग्णालयातूनही संजय राऊतांची लेखणी सुरूच, अग्रलेख लिहितांनाचा फोटो व्हायरल

शिवसेनेचे नेते आणि सामनाचे संपादक संजय राऊत हे आजारी असूनही त्यांची शिवसेनेसाठी असलेली लढाई सुरूच आहे. त्यांनी आज सकाळी ‘लहरों से डर कर नौका पार नही होती, कोशिश करने वालों की कभी हार नहीं होती… बच्चन, हम होंगे कामयाब… जरूर होंगे’ असं ट्विट केलं. सध्या राऊत लिलावती रुग्णालयात दाखल आहेत. गेल्या 15 दिवसांपासून ते रोज सकाळी ते पत्रकार परिषद घेऊन शिवसेनेची भूमिका मांडत आहेत. मात्र सोमवारी रुग्णालयात दाखल केल्याने आज ते पत्रकार परिषद घेऊ शकले नाही. मात्र रुग्णालयातही त्यांची लेखणी थांबलेली नाही. रुग्णालयाच्या बेडवरुन ते सामनासाठी अग्रलेख लिहित आहेत.

त्यांच्या हातावर डॉक्टरांकडून लावण्यात आलेल्या सुया स्पष्टपणे दिसत आहेत.

सोमवारी अचानक त्यांना छातीत दुखू लागल्याने ते लिलावती रुग्णालयात दाखल झाले. त्यांच्यावर अँजिओप्लास्टी करण्यात आली आहे. मात्र रुग्णालयामधूनही त्यांची पत्रकारिता सुरूच आहेत. रुग्णालयात बसून उद्यासाठी अग्रलेख लिहित असल्याचा त्यांचा एक फोटोही समोर आला आहे. या फोटोमध्ये संजय राऊत रुग्णालयाच्या बेडवर बसलेले दिसत आहेत. त्यांच्या हातावर डॉक्टरांकडून लावण्यात आलेल्या सुया स्पष्टपणे दिसत आहेत. याही अवस्थेत संजय राऊत शिवसेनेला सत्तास्थापनेत सहभागी करण्यासाठी सक्रीय दिसत आहेत.

महाराष्ट्रात सत्तास्थापनेचा तिढा अद्यापही सुटलेला नाही. सोमवारी शिवसेनेचा सत्तास्थापनेचा दावा केला मात्र काँग्रेस आणि राष्ट्रवादीने ऐन वेळी पाठिंबा पत्र न दिल्यामुळे त्यांची चांगलीच कोंडी झाली. यानंतर राज्यपालांनी राष्ट्रवादी काँग्रेसला सत्ता स्थापनेचे निमंत्रण दिले आहे. आता राष्ट्रवादी काँग्रेसचे अध्यक्ष शरद पवार राज्याच्या राजकारणात पुन्हा एकदा केंद्रस्थानी आल्याचे चित्र आहे. सत्तास्थापनेच्या दृष्टीने आजचा दिवस अत्यंत महत्त्वाचा मानला जातोय. राष्ट्रवादी आणि काँग्रेस दोन्ही पक्षांच्या आज महत्त्वाच्या बैठका होत आहे. दरम्यान राज्यात कोणाची सत्ता स्थापन होणार की राष्ट्रपती राजवट लागणार हे पाहणे महत्त्वाचे ठरणार आहे.

भाजपाचे ७ आमदार राष्ट्रवादीच्या संपर्कात, अजित पवारांना केलेत फोन

सत्तास्थापनेस असमर्थ ठरल्यानंतर भाजपला आणखी एक मोठा धक्का बसण्याची शक्यता आहे. कारण भाजपचे ७ आमदार राष्ट्रवादी काँग्रेसच्या संपर्कात आहेत तर त्यांनी राष्ट्रवादीचे नेते आणि माजी उपमुख्यमंत्री अजित पवार यांना फोन केल्याची माहिती सूत्रांकडून मिळाली आहे. भाजपच्या चिन्हावर निवडणूक लढवलेले हे आमदार राष्ट्रवादीच्या संपर्कात असल्याची माहिती आहे.निवडणूकीपूर्वी यांनी मेगाभरतीमध्ये भाजपात प्रवेश केला होता.

अजित पवारांना फोन करणारे सातपैकी 2 आमदार सातारा जिल्ह्यातील तर एक आमदार पुणे जिल्ह्यातील असल्याची माहिती आहे. गरज पडल्यास आम्ही राजीनामा देऊ, असं या आमदारांनी अजित पवारांना सांगितल्याचं कळतंय. या आमदारांनी राजीनामा देण्याचा निर्णय घेतल्यास भाजपला मोठा धक्का बसणार आहे.

दरम्यान, महाराष्ट्र विधानसभा निवडणूक निकालानंतर महाराष्ट्रात अस्थिरतेची परिस्थिती निर्माण झाली. भाजप आणि शिवसेनेत मुख्यमंत्रिपदावरून मोठा संघर्ष निर्माण झाला. कोणत्याही एका पक्षाला बहुमत मिळालं नसल्याने राजकीय पेच निर्माण झाला. मात्र सर्वाधिक जागा असल्याने सुरुवातीला भाजप सत्तास्पर्धेत पुढे होता. त्यामुळे मग निवडून आलेल्या अपक्ष आमदारांनी भाजपच्या दिशेने आपला मोर्चा वळवला.

अनेक अपक्ष आमदारांनी भाजपला आपला पाठिंबा जाहीर केला होता. मात्र आता सत्तेची समीकरणं बदलली आहेत. महाराष्ट्रात शिवसेना, काँग्रेस आणि राष्ट्रवादी यांचं एकत्रित म्हणजे महाशिवआघाडीचं सरकार स्थापन होण्याची शक्यता बळावली आहे. या पार्श्वभूमीवर शिवसेनेसह आघाडीतील दोन्ही पक्षांनी पुन्हा एकदा अपक्षांना आपल्या बाजूने वळवण्यासाठी हालचाली सुरू केल्या आहेत. भाजपला पाठिंबा दिलेल्या अपक्षांना आपल्याकडे खेचण्याचा प्रयत्न काँग्रेस, राष्ट्रवादीनेही सुरू केल्याची माहिती आहे.

सर्वसाधारणपणे अपक्ष आमदार सत्तेच्या बाजूने उभं राहण्याचा निर्णय घेतात. आता राज्यात सत्तेचं समीकरणच बदलत असल्याने आधी पाठिंबा दिलेले आमदारही भाजपला धक्का देत काँग्रेस, राष्ट्रवादी किंवा शिवसेनेकडे जाण्याची चर्चा जोर धरू लागली आहे. त्यामुळे भाजप सत्ता स्थापन करणार नसल्याने आता अपक्ष आमदार भाजपची साथ सोडून इतर पक्षात जाणार का, हे पाहणं औत्सुक्याचं ठरणार आहे.

भाजपाचा सत्तास्थापनाच्या दाव्यास नकार, शिवसेनेला शुभेच्छा

महाराष्ट्रात सत्ता स्थापनेच्या पार्श्वभूमीवर भाजप नेत्यांच्या शिष्टमंडळांने राज्यपाल भगतसिंग कोश्यारी यांची राजभवन येथे जाऊन भेट घेतली. या शिष्टमंडळात भाजचे प्रदेशाध्यक्ष चंद्रकांत पाटील, गिरीश महाजन, आशिष शेलार आणि सुधीर मुनगंटीवार,पंकजाताई मुंडे या बड्या नेत्यांचा समावेश होता. राज्यपालांसोबत बैठक झाल्यानंतर भाजपच्या या शिष्टमंडळाने पत्रकार परिषद घेतली आणि पत्रकार परिषदेत भाजपकडून राज्यपालांकडे सत्ता स्थापनेचा दावा केला गेला नसल्याचे सांगण्यात आले. राज्यात सत्ता स्थापनेच्या पार्श्वभूमीवर आमची राज्यपालांशी चर्चा झाली. त्यानंतर भाजपच्या कोअर कमिटीची बैठक घेण्यात आली आणि त्यानंतर भाजपने सत्ता स्थापनेच्या दाव्यास नकार दिला आहे,जर शिवसेना काँग्रेस राष्ट्रवादीसोबत जाऊन जर सरकार स्थापन करत असतील तर त्यांना आमच्या शुभेच्छा असंही यावेळी सांगण्यात आले.