कोल्हापूरात पीएन पाटील समर्थक नाराज,एकनिष्ठा हरली,पैसा जिंकला

images (5).jpeg कोल्हापूरात पीएन पाटील गटाचा कार्यकर्ता मेळावा
पीएन पाटील कोणती भूमिका घेणार याकडे लक्ष

कोल्हापूर : अनेक दिवसांच्या प्रतिक्षेनंतर ठाकरे सरकारचा पहिला मंत्रिमंडळ विस्तार आज (30 डिसेंबर) पार पडला. यावेळी विधानभवन परिसरात महाविकास आघाडीच्या 36 आमदारांना मंत्रिपदाची शपथ देण्यात आली. मुख्यमंत्री उद्धव ठाकरे यांच्या उपस्थितीत राज्यपाल भगतसिंह कोश्यारी यांनी 36 आमदारांना मंत्रिपदाची शपथ दिली. यावेळी कोल्हापूरचे काँग्रेसचे आमदार सतेज पाटील यांनीही महाविकास आघाडीच्या मंत्रिमंडळ विस्तारात राज्यमंत्री म्हणून शपथ ग्रहण केली. मात्र, राज्यमंत्रिपदासाठी त्यांचं नाव जाहीर होताच काँग्रेसचे नेते आणि प्रदेश उपाध्यक्ष आमदार पी. एन. पाटील यांच्या समर्थकांमध्ये नाराजीचा सूर उमटला. काँग्रेस पक्षासोबत तब्बल 40 वर्ष एकनिष्ठ राहूनही मंत्रिपद न मिळाल्याने पी. एन. पाटील यांच्या समर्थकांनी सोशल मीडियाच्या माध्यमातून आपल्या भावनांना वाट मोकळी करून दिली.

kolhapur-satej-patil-p-n-patil

आमदार पी. एन. पाटील यांच्या समर्थकांनी सोशल मीडियावर एक फोटो पोस्ट केला. या फोटोमध्ये एक तराजू दाखवण्यात आला आहे. या तराजुच्या एका पारड्यात पैसे आणि दुसऱ्या पारड्यात 40 वर्षांची पक्षनिष्ठा दाखवण्यात आली आहे. यामध्ये पैशाचं पारडं हे जड असल्याने ते झुकलेलं दाखवलं आहे, तर पक्षनिष्ठतेचं वजन कमी असल्याचं दाखवण्यात आलं आहे. हा फोटो अनेक पी. एन. पाटील समर्थकांनी त्यांच्या सोशल मीडियावर स्टेटसला अपलोड केला आहे.

विधानसभा निवडणुकीत कोल्हापूर जिल्ह्यात काँग्रेस-राष्ट्रवादी आघाडीला घवघवीत यश मिळालं. यात काँग्रेसला चार ठिकाणी विजय मिळाला. महाविकास आघाडी सत्तेत आल्यानंतर काँग्रेस पक्षाशी 40 वर्षाहून अधिक काळ एकनिष्ठ असलेले आमदार पी. एन. पाटील आणि विधान परिषदेचे आमदार सतेज पाटील यांच्यात मंत्रिपदासाठी रस्सीखेच होती. पी. एन. पाटील यांच्यासाठी गोकुळच्या सत्ताधाऱ्यांनी तर सतेज पाटील यांच्यासाठी जिल्हा परिषद सदस्य आणि पंचायत समिती सदस्यांनी वरिष्ठांची भेट घेतली होती. एप्रिल महिन्यात होणाऱ्या गोकुळच्या निवडणुकीच्या पार्श्वभूमीवर या दोन्ही नेत्यांपैकी कोणाला मंत्रिपद मिळणार याची उत्सुकता शिगेला पोहोचली. अखेर सतेज पाटील यांनी यात बाजी मारत राज्यमंत्रिपद मिळवलं.

आमदार पी. एन. पाटील यांना पुन्हा एकदा मंत्रिपदापासून वंचित राहावं लागलं, त्यामुळे त्यांचे समर्थक नाराज आहेत. आज सोशल मीडियावर वेगवेगळ्या पोस्ट करत त्यांनी आपली नाराजी व्यक्त केली. त्यातही पी. एन. पाटील समर्थकांकडून व्हायरल केला जाणारा तराजुचा फोटो सध्या चर्चेचा विषय बनला आहे. ‘आजचा सुविचार’ या नावाने व्हायरल होणारा हा फोटो दोन्ही नेत्यांमधील अंतर्गत चढाओढ दर्शवणारी ठरत आहे.

गोकुळ निवडणुकीत विनय कोरे करणार महाडीक गटाला मदत

कोल्हापूर : संस्थांचे ठराव गोळा करण्यास सुरुवात झाल्यानंतर गोकुळच्या राजकारणात रोज वेगवेगळे कंगोरे सामोरे येत आहेत. आमचं ठरलंय म्हणत सत्ताधाऱ्यांविरोधातील आवाज उठवणाऱ्या विरोधी गटातील विनय कोरे हेदेखील माजी आमदार महादेवराव महाडिक यांना मदत करणार आहेत. विधानसभा निवडणुकीतील मदतीची परतफेड म्हणून कर्णसिंह गायकवाड यांना संचालकपद मिळवून देण्यासाठी कोरे यांनी ही भूमिका घेतली आहे.

विरोधी गटातील प्रमुख शिलेदार असलेले विनय कोरे हेदेखील महाडिकांच्या बाजूने झाले आहेत. त्यांच्या संस्था गोकुळशी संलग्न नसल्या तरी त्यांना मानणाऱ्या कार्यकर्त्यांच्या सुमारे शंभरावर संस्थांचे ठराव आपल्याकडे वळवू शकतात. शाहूवाडीमध्ये सर्जेराव पाटील पेरिडकर यांच्याकडे जास्त ठराव आहेत.

          या जोरावरच त्यांनी एखादी जागा मिळावी म्हणून सत्ताधा-यासमवेत जाण्याचा निर्णय घेतला आहे. विधानसभा निवडणुकीत शाहूवाडी मतदारसंघात कर्णसिंह गायकवाड यांनी मदत करण्याच्या बदल्यात गोकुळच्या संचालकांचा शब्द दिला होता. आता त्याची पूर्तता करण्यासाठीच कोरे यांनी सत्ताधाऱ्यांशी संधान साधले आहे.

गतवेळी क्रॉस व्होटिंगच्या माध्यमातून सत्ताधाऱ्यांना चांगलाच घाम फुटला असल्याने सत्ताधाऱ्यांनी सुरुवातीपासून सावध भूमिका घेत ठराव गोळा करतानाच बऱ्यापैकी चित्र आपल्या बाजूने तयार करून घेतले आहे.

विनय कोरे गटाचे ठराव (अंदाजित)

  • शाहूवाडी : ७०
  • पन्हाळा : २५
  • हातकणंगले : १०

सत्तेत स्थान न मिळाल्याने आघाडीतील घटक पक्ष नाराज

मुख्यमंत्री उद्धव ठाकरे यांच्या नेतृत्त्वाखालील महाविकास आघाडी सरकारचा बहुचर्चित मंत्रिमंडळ विस्तार अखेर आज होणार आहे. विधानभवनाच्या परिसरात शपथविधी सोहळा पार पडेल. आज महाविकास आघाडीतील एकूण 36 मंत्री शपथ घेतील. त्यातच महाविकास आघाडी सरकारच्या मंत्रिमंडळाचा विस्तार होत असताना आघाडीतील अंतर्गत वाद मात्र चव्हाट्यावर आला आहे. आज होणाऱ्या मंत्रिमंडळ विस्तारात अपेक्षित वाटा न मिळाल्यामुळे घटक पक्ष नाराज असल्याचं समोर आलं आहे. 

काँग्रेस- राष्ट्रवादी काँग्रेसचे घटक पक्ष नाराज झाले आहेत. यामध्ये स्वाभिमानी शेतकरी संघटना, शेकाप, समाजवादी पक्ष, भाकप, बहुजन विकास आघाडी, प्रहार यांचा समावेश असल्याचं कळतंय. स्वाभिमानी शेतकरी संघटनेचे नेते राजू शेट्टी, शेकापचे जयंत पाटील, समाजवादी पक्ष, प्रहारचे बच्चू कडू आदी पक्षांनी महाविकास आघाडी सरकारला पाठिंबा दिला. बच्चू कडू यांनी शिवसेनेला पाठिंबा दिला आहे. तर इतर पक्षांनी काँग्रेस- राष्ट्रवादीसह निवडणुकीत आघाडी केली होती. त्यामुळे मंत्रिमंडळात स्थान मिळावं अशी त्यांची अपेक्षा होती. 

अजित पवारांसह ३५आमदारांनी घेतली मंत्रीपदाची शपथ

महाविकास आघाडी सरकारचा मंत्रिमंडळ विस्ताराचा शपथविधी सोहळा विधिमंडळ परिसरात पार पडला. एकूण ३६ मंत्र्यांना राज्यपालांनी पद आणि गोपनियतेची शपथ दिली. अजित पवार, अशोक चव्हाण, दिलीप वळसे पाटील, आदित्य ठाकरे आणि जितेंद्र आव्हाड यांच्यासह २६ आमदारांनी कॅबिनेटमंत्रिपदाची शपथ घेतली. तर दहा आमदारांनी राज्यमंत्रिपदाची शपथ घेतली. राज्यातील सत्ता स्थापनेच्या नाट्याला वेगळं वळण देणारे राष्ट्रवादीचे नेते अजित पवार पुन्हा एकदा सत्तेत आले आहेत. आज झालेल्या मंत्रिमंडळ विस्ताराच्या कार्यक्रमात अजित पवार यांनी उपमुख्यमंत्रिपदाची शपथ घेतली. अजित पवार यांनी अवघ्या दीड महिन्यात दुसऱ्यांदा उपमुख्यमंत्रिपदाची शपथ घेतली आहे.

ज्येष्ठ समाजसेवक अण्णा हजारेंचे मौनव्रत

पारनेर : महिलांवरील अत्याचाराचा गुन्हा दाखल झाल्यानंतर न्यायालयीन सुनावणी व शिक्षेची प्रक्रिया जलद व्हावी, या मागणीसाठी ज्येष्ठ समाजसेवक अण्णा हजारे शुक्रवारपासून राळेगणसिद्धीत मौन व्रत धारण करणार आहेत. यासंदर्भात हजारेंनी १० डिसेंबरला पंतप्रधानांना, तर १३ डिसेंबरला राष्ट्रपतींना पत्र पाठवले आहे.


पत्रकात हजारे यांनी म्हटले आहे की, हैदराबादमध्ये तरुणीवर अत्याचार करून तिला जिवंत जाळणाऱ्या चौघा आरोपींना पोलिसांनी एन्काउंटर करून ठार केले. त्यानंतर देशातील जनतेने आनंद व्यक्त केला. पोलिस व न्यायालयीन प्रक्रियेत होणाऱ्या विलंबामुळे जनतेने या एन्काउंटरनंतर आनंदोत्सव साजरा केला. याचाच अर्थ न्यायव्यवस्थेवरील जनतेचा विश्वास कमी होऊ लागला आहे. न्याय मिळण्यात होत असलेल्या विलंबामुळे जनतेत आक्रोश आहे.


पोलिसांचा तपास, तपासानंतर न्यायालयात होणारी सुनावणीची प्रक्रिया सुलभ व जलद असली पाहिजे. महिलांच्या सुरक्षेसाठी राष्ट्रीय स्तरावर हेल्पलाइनचे काम योग्य असले पाहिजे. सर्वोच्च न्यायालयाने पोलिस दलात सुधारणा करण्यासंदर्भात केलेल्या सूचनांवर तत्काळ अंमलबजावणी झाली पाहिजे. सन २०१२ पासून प्रलंबित ज्युडिशियल अकाउंटेबिलिटी बिल तत्काळ मंजूर झाले पाहिजे. त्यासाठी सरकारने न्यायाधीशांची रिक्त पदे तत्काळ भरणे गरजेचे आहे.