कोल्हापूर जिल्हा परिषदेत महाविकास आघाडीची सत्ता

PicsArt_01-02-05.21.37.jpgकोल्हापूर : कोल्हापूर जिल्हा परिषदेतील भाजपची सत्ता संपुष्टात आली आहे. कोल्हापुरात महाविकास आघाडीने भाजपच्या अडीच वर्षाच्या सत्तेला सुरुंग लावला. जिल्हा परिषदेच्या अध्यक्षपदी काँग्रेसचे बजरंग पाटील यांची निवड झाली. त्यांनी भाजपच्या अरुण इंगवले यांचा पराभव केला. अरुण इंगवले यांना 24 तर बजरंग पाटील यांना 41 मतं मिळाली. कोल्हापूर महानगरपालिकेनंतर आता जिल्हा परिषदेतही महाविकास आघाडीची सत्ता स्थापन झाली आहे.

जिल्हा परिषदेतील या निकालामुळे भाजप कोल्हापुरातून हद्दपार झाली आहे. कारण कोल्हापुरात भाजपचा एकही आमदार निवडून आलेला नाही. शिवाय दोन्ही खासदार शिवसेनेचे आहेत. याशिवाय महापालिकेतही काँग्रेस-राष्ट्रवादीची सत्ता आहे. केवळ कोल्हापूर जिल्हा परिषदेत भाजपची सत्ता होती. मात्र अडीच वर्षात ती सत्ता सुद्धा हातातून निसटली आहे.

काँग्रेस, राष्ट्रवादी आणि शिवसेनेची महाविकास आघाडीने एकत्र येऊन कोल्हापूर झेडपीतील भाजपची सत्ता उलथवून लावण्याचा चंग बांधला होता. त्यामध्ये त्यांना यश आलं. महाविकास आघाडीकडून अध्यक्षपदासाठी काँग्रेसकडून बजरंग पाटील आणि उपाध्यक्षपदासाठी सतीश पाटील यांना उमेदवारी देण्यात आली होती.

राज्यात सत्तेत आलेल्या महाविकास आघाडीच्या फॉर्म्युल्यानंतर आता अडीच वर्षे विरोधात राहिलेल्या काँग्रेस-राष्ट्रवादीने शिवसेनेच्या साथीने सत्ता काबीज करण्याची तयारी केली होती. तर दुसऱ्या बाजूला भाजपने स्थानिक आघाड्यांना एकत्र करत सत्ता टिकवून ठेवण्यासाठी जोरदार प्रयत्न केले होते.

महाविकास आघाडीमुळे भाजपला जिल्हा परिषदेवरील आपली सत्ता टिकवणे प्रतिष्ठेचे बनले होते. त्यासाठी भाजप प्रदेशाध्यक्ष चंद्रकांत पाटील यांनी कंबर कसली होती. तर दुसर्‍या बाजूला काँग्रेस आणि राष्ट्रवादीनेही शिवसेनेला सोबत घेण्याची रणनीती आखली. त्यासाठी काँग्रेसचे आमदार सतेज पाटील आणि राष्ट्रवादीच्या हसन मुश्रीफ यांनी प्रदेश पातळीवरून प्रयत्न सुरू केले. त्यामुळे एक तारखेला आम्ही बहुमताच्या पुढे असू असा विश्वास सतेज पाटील यांनी व्यक्त केला होता. अखेर सतेज पाटील आणि हसन मुश्रीफ या जोडगोळीने भाजपची सत्ता उलथवून लावली आहे.

कधीकाळी एखादा जिल्हा परिषद सदस्य असलेल्या भाजपला अडीच वर्षांपूर्वी झालेल्या निवडणुकीत 67 पैकी तब्बल 14 जागा मिळाल्या होत्या. काँग्रेसलाही या निवडणुकीत 14 जागा मिळाल्या असल्या तरी राष्ट्रवादी बरोबरच स्थानिक आघाड्यांना एकत्र घेण्यात काँग्रेस मागे पडली आणि इतिहासात पहिल्यांदाच कोल्हापूर जिल्हा परिषदेवर भाजपचा झेंडा फडकला होता. स्वाभिमानी शेतकरी संघटनेबरोबरच  इतर स्थानिक आघाड्यांना बरोबर घेऊन भाजपने 34 आकडा गाठून आपलं बहुमत सिद्ध केलं आणि अध्यक्षपदाची माळ भाजपचे माजी आमदार अमल महाडिक यांच्या पत्नी शौमिका महाडिक यांच्या गळ्यात पडली होती. मात्र शैमिका महाडिक या अडीच वर्षेच अध्यक्षपदी राहिल्या.

नामदार बच्चू कडू यांचा दणका,कामचुकार तहसिलदार निलंबित

 

अमरावती-राज्यमंत्री म्हणून शपथ घेतलेल्या बच्चू कडू यांनी मंत्री झाल्यानंतर आपल्या पहिल्याच दौऱ्यात दोन अधिकाऱ्यांना दणका दिला आहे. बच्चू कडू यांनी अमरावती येथील दर्यापूर तहसील कार्यालयाला अचानक भेट दिली. त्यावेळी संजय गांधी निराधार योजनेत हलगर्जीपणा केल्याप्रकरणी दोन अधिकाऱ्यांच्या निलंबनाचे आदेश त्यांनी दिले आहेत. निरीक्षण अधिकारी सपना भोवते आणि नायब तहसीलदार प्रमोद काळे यांच्यावर नागरिकांना रेशन कार्ड न दिल्याप्रकरणी निलंबनाची कारवाई करण्यात आली आहे. बच्चू कडू हे आक्रमक लोकप्रतिनिधी म्हणून ओळखले जातात. ३० डिसेंबरला झालेल्या मंत्रिमंडळ विस्तारात त्यांना राज्यमंत्री करण्यात आले. अद्याप त्यांच्याकडे कोणते खाते आहे याचीही माहिती समोर आलेली नाही. मात्र आपल्या पहिल्याच दौऱ्यात दोन अधिकाऱ्यांना त्यांनी दणका दिला आहे.

अमरावती जिल्ह्यातील दर्यापूर तहसील कार्यालयात आज दुपारी तीन वाजण्याच्या सुमारास राज्यमंत्री बच्चू कडू यांनी भेट दिली. त्यांच्या अचानक भेटीमुळे तहसील कार्यालयाचे धाबे दणाणले. राज्यमंत्री बच्चू कडू यांनी तातडीने आढावा बैठकीचं आयोजन करा असं सांगितलं. या आढावा बैठकीमध्ये तहसील कार्यालयाच्या अंतर्गत रखडलेल्या कामांची राज्यमंत्र्यांनी माहितीही घेतली. या बैठकीत संजय गांधी निराधार योजना आणि पुरवठा विभाग या दोन विषयांवर तब्बल तासभर बैठक झाली. काही लाभार्थ्यांनी संजय गांधी निराधार योजना विभाग आणि पुरवठा विभागात वारंवार चकरा मारुनही आमचे काम झाले नाही अशी तक्रार थेट बच्चू कडू यांच्याकडे केली. ज्यानंतर बच्चू कडू यांनी तातडीने दोन अधिकाऱ्यांच्या निलंबनाचे आदेश दिले.