शिवभोजन नंतर आता भाजपाची दीनदयाळ थाळी

Navmaharashtra News

शिवसेनेच्या बहुचर्चित शिवभोजन थाळीनंतर आता भाजपाने आता दीनदयाळ थाळी चालू केली आहे. पंढरपूरमधून या दीनदयाळ थाळी योजनेची सुरुवात झाली आहे. पंढरपूरमध्ये विठ्ठलाच्या दर्शनासाठी येणाऱ्या भाविकांना डोळयासमोर ठेऊन या भाजपाने दीनदयाळ थाळीची सुरुवात केली आहे.

शिवभोजन थाळीच्या तुलनेत दीनदयाळ थाळीची किंमत थोडी जास्त आहे. पण या थाळीमध्ये १० पदार्थ आहेत. शिवभोजन थाळी १० रुपयांना तर, दीनदयाळ थाळी ३० रुपयांना आहे. शिवभोजन थाळीत भात, भाजी, वरण आणि पोळी असे चार पदार्थ दिले जातात.तर दीनदयाळ थाळीमध्ये तीन चपात्या, डाळ, भात, भाजी, चटणी, पापड, लोणचे, कांदा लींबू याचा आस्वाद घेता येईल.विठ्ठल मंदिरापासून अवघ्या काही मिनिटांच्या अंतरावर इंदिरा गांधी भाजी मार्केटजवळ ही थाळी आजपासून सुरु झाली आहे.

पंडीत दीनदयाळ उपाध्याय यांच्या जयंतीचे औचित्य साधून माजी सहकारमंत्री सुभाष देशमुख यांच्या हस्ते या थाळीचा शुभारंभ झाला. पंढरपूरातील एका महिला बचत गटाला सोबत घेऊन भाजपाने ही योजना सुरु केली आहे. दुपारी १२ ते एक या वेळेत ही थाळी सर्वांना दिली जाईल.

सरकारी कर्मचाऱ्यांना आठवडा ५ दिलसांचा अन् पगार ७ दिवसांचा – बच्चू कडू

Nav maharashtra news

राज्य सरकारच्या कर्मचाऱ्यांना पाच दिवसांचा आठवडा करण्याच्या ठाकरे सरकारच्या निर्णयावर बच्चू कडू यांनी आक्षेप नोंदवला आहे. पाच दिवसांचा आठवडा करण्याची गेल्या अनेक वर्षांपासूनची शासकीय कर्मचाऱ्यांची मागणी ठाकरे सरकारनं मान्य केली आहे. येत्या २९ फेब्रुवारीपासून या निर्णयाची अंमलबजावणी केली जाणार आहे. पण सरकारमध्येच मंत्री असलेल्या बच्चू कडू यांना हा निर्णय पटलेला नाही. त्यांनी या निर्णयावर जोरदार टीका केली आहे.

सरकारी कर्मचाऱ्यांसाठी आठवडा पाच दिवसांचा असेल तर, सात दिवसांचा पगार का द्यायचा? असा सवाल बच्चू कडू यांनी विचारला आहे. चांगले काम करणाऱ्या सरकारी कर्मचाऱ्यांसाठी चार दिवसांचा आठवडा केला तरी चालेल, पण दोन दिवसही व्यवस्थित काम न करणाऱ्या कर्मचाऱ्यांसाठी पाच दिवसांचा आठवडा का करायचा? असे प्रश्न बच्चू कडू यांनी उपस्थित केले आहेत. एकप्रकारे त्यांनी उद्धव ठाकरे सरकारला घरचा आहेर दिला आहे. काही कर्मचाऱ्यांच्या टेबलावरुन फायली महिनो न महिने पुढे सरकत नाहीत, अशा कर्मचाऱ्यांना लाभ का द्याचे? हा त्यांचा मुद्दा आहे.

काही दिवसांपूर्वी मुख्यमंत्री उद्धव ठाकरे यांनी सह्याद्री अतिथीगृहावर शासकीय अधिकारी व कर्मचाऱ्यांच्या प्रश्नांसंबंधी बैठक घेतली होती. अधिकारी महासंघाचे मुख्य सल्लागार ग.दि. कुलथे, अध्यक्ष विनोद देसाई, सरचिटणीस विनायक लहाडे, डॉ. सोनाली कदम, तसेच नगरविकास मंत्री एकनाथ शिंदे, सामान्य प्रशासन विभागाचे अपर मुख्य सचिव सिताराम कुंटे, गृह विभागाचे अपर मुख्य सचिव संजय कुमार, वित्त विभागाचे अपर मुख्य सचिव मनोज सौनिक, प्रधान सचिव नितिन गद्रे, मुख्यमंत्र्यांचे प्रधान सचिव विकास खारगे आदी वरिष्ठ अधिकारी उपस्थित असलेल्या या बैठकीत पाच दिवसांचा आठवडा करण्याचे संकेत मुख्यमंत्र्यांनी दिले होते.

दिल्लीत राष्ट्रवादीच्या उमेदवारांना किती मते मिळाली?

Navmaharashtra news

नवी दिल्ली : दिल्ली विधानसभा निवडणुकीत आम आदमी पक्षाने 63 जागांवर आघाडी मिळवत भाजपला जोरदार धक्का दिला आहे, तर काँग्रेसचा सुपडासाफ झाला आहे. दिल्ली निवडणुकांच्या रिंगणात राष्ट्रवादीचे पाच उमेदवारही उतरले होते, त्यांनाही पराभवाला सामोरं जावं लागलं.

‘आम आदमी पक्षा’चा राजीनामा देऊन राष्ट्रवादीच्या तिकीटावर निवडणूक लढवणाऱ्या सुरेंद्र सिंह यांना आमदारकी गमवावी लागली आहे. दिल्ली कँटॉन्मेंट या आपल्याच मतदारसंघातून सुरेंद्र सिंह निवडणूक लढवत होते. मात्र इथे ‘आप’चे वीरेंद्रसिंह कडियान विजयी झाले, तर भाजपचे मनिष सिंह दुसऱ्या क्रमांकावर राहिले. कडियान यांना जवळपास 26 हजार, तर मनिष सिंह यांना अंदाजे 17 हजार मतं मिळाली.

दिल्ली कँटॉन्मेंट मतदारसंघात काँग्रेस उमेदवार तिसऱ्या, तर बसप उमेदवार चौथ्या क्रमांकावर आहे. राष्ट्रवादीचे सुरेंद्र सिंह यांना अवघी 854 मतं मिळाली. विद्यमान आमदाराला जनतेने नाकारल्यामुळे उमेदवारापेक्षा पक्षाला प्राधान्य दिल्याचं दिसत आहे.

राष्ट्रवादीच्या इतर उमेदवारांचे निकाल

गोकुलपूर – सुरेंद्र कुमार (आप) – 88 हजार 90 मतं, रणजीत सिंह (भाजप) 68 हजार 575 मतं, सातव्या क्रमांकावर फतेह सिंह (राष्ट्रवादी) – 418 मतं, ‘नोटा’ला अधिक मतं – 449

बाबरपूर – गोपाल राय (आप) – 58 हजार 827 मतं, नरेश गौर (भाजप) – 35 हजार 564 मतं, सहाव्या क्रमांकावर झाहिद अली (राष्ट्रवादी) – 100 मतं, ‘नोटा’ला अधिक मतं – 211

छत्तरपूर – कर्तार सिंह तन्वर – 66 हजार 451 मतं, ब्रह्म सिंह तन्वर – 663 हजार 13 मतं, आठव्या क्रमांकावर राणा सुजीत सिंह (राष्ट्रवादी) – 171 मतं, ‘नोटा’ला अधिक मतं – 637

मुस्तफाबाद – हाजी युनूस (आप) – 98 हजार 681 मतं, जगदीश प्रधान (भाजप) – 77 हजार 845 मतं, पाचव्या क्रमांकावर मयुर भान 288 मतं, ‘नोटा’ला अधिक मतं – 459

घरगुती गॅस सिलिंडरच्या दरात मोठी वाढ

Navmaharashtra News

घरगुती गॅस सिलिंडरच्या दरात पुन्हा वाढ झाली आहे. त्यामुळे सर्वसामान्यांच्या खिशाला पुन्हा कात्री लागणार आहे. सलग पाचव्या महिन्यात गॅस सिलिंडरच्या दरात वाढ झाली आहे. इंडियन ऑईलने दिलेल्या माहितीनुसार, दिल्लीमध्ये १४ किलोच्या गॅस सिलिंडरच्या दरात १५५.५० रुपयांनी वाढ झाली असून दिल्लीत या सिलिंडरसाठी ८५८.५० रुपये मोजावे लागणार आहेत. मुंबईमध्ये गॅस सिलिंडरच्या दरात १४५ रुपयांनी वाढ झाली असून त्यासाठी ८२९.५० रुपाये मोजावे लागणार आहेत. तर कोलकातामध्ये गॅस सिलिंडरच्या दरात १४९ रुपयांनी वाढ झाली असून त्यासाठी ८९६ रुपये मोजावे लागणार आहेत.सिलिंडर दर १४.२ किलो –    ७४९.०० रुपये व १९ किलो –      १५५०.०२ रुपये हे असतील.